هو احنا ليه مش بنحس بالقرآن؟ !!!

ساعات كتير تبقى قاعد تقرا في المصحف و...و لو جه فجأة حد قاطعك .. و سألك .. الا انت حاسس بايه و انت بتقرا .. هتلاقي نفسك مش حاسس حاجة .. و لو قاللك طب عندك خواطر عن الايات .. هتسكت .. و لو سالك هو انت كنت بتقرا في ايات ايه .. هتلاقي نفسك نسيت .. .. طب اقعد يا سيدي كمل قراءة .. تلاقي نفسك ناسي انت وقفت عند انهي آيه..و يا سلام لو كان المصحف اتقفل منك قبل ما تحط علامة .. ابقى قابلني لو افتكرت انت عند انهي سورة...
و الحكايه دي عندنا بتبقى واضحة اوي في رمضان نختم ختمة و اتنين بس ياترى ايه اللي طلعت بيه جديد?!!! ..ايه اللي استفدته?!!! .. مفيش...

و اكبر دليل على ان تعاملنا مع القرآن ينقصه الكثير و الكثير هو واقعنا الذي نحياه نقرأ القرآن دون ان يترك اثر في افعالنا و سلوكنا .. .. يمكن همنا على قراءة اكبر قدر عملا بالحديث "من قرأ حرفا من كتاب الله فله به حسنة , و الحسنة بعشر امثالها , لااقول الم حرف ولكن الف حرف و لام حرف و ميم حرف"

بس اكيد مش هو ده الغرض الاساسي من قراءة القرآن .. طب ما في حاجات تانية كتير ثوابها اكبر .. و ده مش تقليل من شأن الثواب .. و لكنه شوية تفكير..
زي مثلا الاب لما يرصد مكافأة لابنه ان استمر في المذاكرة عدة ساعات , هو اكيد لا يقصد من وراء ذلك مجرد جلوسه على المكتب و النظر في الكتب دون فهم ما تحويه , بل هدفه تشجيع ابنه على المذاكرة بذهن حاضر ليتحقق النجاح.
يبقى لو فكرنا ليه ربنا و رسولنا شجعنا على تلاوة القرآن هنلاقيه تشجيع المسلمين على دوام الاقتراب منه حتى يهتدوا بهداه و يطبقوا ما فيه ..
لو فكرنا حالنا مع القرآن هنلاقيه فعلا محزن .. يا ريتنا على الاقل بنتعامل معاه زي ما بنقرأ مجلة او جريده .. ده احنا ساعتها لو فيه سطر مفهمناهوش بنرجع نقراه تاني .. و لو جزء سرحنا فيه نرجع نفوق و نركز.. اما القرأن ممكن نقرا سورة ورا سورة ولا احنا هنا ...

لازم نراجع نفسنا في تعاملنا مع القرآن .. لان نصوص القرآن واضحة في اهمية تدبره عند قراءته او الاستماع اليه , ليكون التدبر وسيلة للفهم و التأثر ثم العمل , يقول تعالى : {كِتَابٌ أَنزَلْنَاهُ إِلَيْكَ مُبَارَكٌ لِّيَدَّبَّرُوا آيَاتِهِ وَلِيَتَذَكَّرَ أُوْلُوا الْأَلْبَابِ }ص29.. {لَوْ أَنزَلْنَا هَذَا الْقُرْآنَ عَلَى جَبَلٍ لَّرَأَيْتَهُ خَاشِعاً مُّتَصَدِّعاً مِّنْ خَشْيَةِ اللَّهِ وَتِلْكَ الْأَمْثَالُ نَضْرِبُهَا لِلنَّاسِ لَعَلَّهُمْ يَتَفَكَّرُونَ }الحشر21.. يا ترى احنا ليه قلوبنا اقسى من الحجارة ؟؟
اللي عاوزة اوصله هو ازاي ممكن نحب القرآن .. و اازاي نخليه يحيينا زي ما احيا الصحابة ؟؟..و ازاي نغير تعاملنا معاه و استقبالنا ليه

موضوع عجبني و إن شاء الله يعجبكم منقول من الرابط التالي
http://www.esnips.com/web/nahyaquraan

محمد السيد كتب:: موضوع عجبني و إن شاء الله يعجبكم منقول من الرابط التالي
http://www.esnips.com/web/nahyaquraan

جزاك الله خيراً و نشكرك علي ذكر المصدر

بارك الله فيك